Sunday, March 27, 2016

Nl. Lalnuntluangi'n National Conference ah paper present

Kan member, Nl. R. Lalnuntluangi, University of Hyderabad a Ph.D Psychology zir mek chuan Pondicherry University a Department of Applied Psychology buatsaih, National Conference on Caring the Elderly: Psychosocial Perspective (NCCE 2016), March 23-24, 2016 a neih takah chuan a research paper, "Social Support and Adherence among elderly with chronic illness" tih chu March ni 23 khan a present a ni, Kan member Nl. R. Lalnuntluangi'n National Conference a research paper a present thei hi keini MPGSU-UoH member te chuan chuanawm kan tiin kan lawmpui em em a ni.
R. Lalnuntluangi (Ph.D Psychology)

UNIVERSITY OF HYDERABAD 2016 NIGHT CUP AH ZONU CHAMPION

University of Hyderabad a Students' Union in kumtina a buatsaih Night Cup (Volleyball, Basketball, Throwball leh Football) chu March ni 11, Zirtawpni ah tan niin, March ni 18, Zirtawpni khan zawh a ni a, Zonu hi Basketball, Throwball leh Football ah te telin Basketball leh Football ah Champion no mawi an hawn ve ve a ni.
Throwball leh Basketball hi Zonu hian March ni 13, Pathianni zanah an khel ve ve a, Throwball hi zan tir lamah khelin Devastators an tum a, vanduaithlak takin an chak lo hlauh mai a. Basketball hi zan dar 12 velah hmeichhe final khelh a ni a, Zonu hian Amateur Shooters tumin 11-7 in chakna an chang a ni.
Zonu Basketball team
Dr. T. Ao Football Night Cup hi March ni 15, Thawhlehni ah khelh tan a ni a, Zopa lam hi team hnih, Zopa Khuangchera leh Zopa Taitesena tiin an chhuak a, anni lam hian vanduaithlak takin quarter final an paltlang lo ve ve a ni. Zonu hian March ni 17 zanah semi final khelin Naga Phoenix team chu Eli leh Chingi goal thun hmangin 2-0 in an hneh a. Final hi March ni 18 zanah khelh niin hetah hian Zonu hian Naga Queen Chilli chu Claire leh Chingi goal thun hmangin 2-0 veka hnehin Champion no mawi an dawng a ni. Hemi mai bakah hian Zonu goalkeeper Apuii'n Best Keeper lawmman a la a, Chingi'n Top Scorer lawmman la in Eli'n Best player lawmman a la bawk a ni.
Zonu Football team
Kum 2016 Night Cup hi MPGSU-Uoh tan bik chhinchhiahtlak tak niin Zonu Captain Juliet-i kaihhruaina hnuaiah kumdanga la thleng ngai lo, a rualin Football leh Basketball ah Zonu ten Champion no mawi an hawn ve ve a ni.

Saturday, March 26, 2016

Nl. Lalhmingmawii'n International Workshop ah paper present

Kan member, Nl. Lalhmingmawii, Ph.D Scholar, Department of Sociology, University of Hyderabad chuan International Workshop on Religion and Law: Colonial and Post-Colonial Encounters, March 9-11, 2016 inkara Centre for the Study of Comparative Religions and Civilizations, Jamia Millia Islamia, New Delhi leh Indian Council of Social Science Research (ICSSR) tangkawpin an buatsaih ah research paper a present a, a paper hming hi "Between legality and illegality: Trans subjects and religious vigilantism in Mizoram" tih a ni. Kan member Nl. Lalhmingmawii'n International workshop a paper a present thei hi keini MPGSU-UoH te chuan kan chhuangin kan lawmpui em em a ni.
Nl. Lalhmingmawii, Ph.D Scholar, University of Hyderabad